पोखरा बस्ने पालिकावासीलाई अन्नपूर्णले दियो सहरमै सेवा

यो आर्थिक वर्षका लागि उनले सामाजिक सुरक्षा भत्ता परिचयपत्र गनुपर्ने थियो । वर्षातको समयमा साबेत गाउँ पुग्न गाह्रो छ । यो समयमा वडा कार्यालयले पोखरा महानगरपालिका–५ स्थित पर्स्याङमा सञ्चालन गरेको घुम्ती सेवा शिविरमार्फत उनले सामाजिक सुरक्षा भत्ता परिचय पत्र नविकरण गरिन् ।

भैखु विक जस्तै अन्नपूर्ण गाउँपालिका–९, उल्लेरीका जालवीर पुन पनि घुम्ती सेवा शिविर सेवाबाट मख्ख देखिन्थे । सेवा शिविरमार्फत उनले आफ्नो अपांगता परिचयपत्र नवीकरण गर्नुका साथै जग्गाको मालपोत कर (तिरो) समेत बुझाए । यो शिविर पोखरामा आयोजना हुन्थेन भने आफूहरूले सास्ती खेप्नुपर्ने पुनले सुनाए । उनले भने, ‘यहाँ सेवा शिविर नआएको भए गाउँ जानुपथ्र्यो । समय बर्बाद हुन्थ्यो, पैसा खर्च हुन्थ्यो ।’

वडा कार्यालयले सञ्चालन गरेको घुम्ती सेवा शिविरले स्थानीय सरकारको प्रत्याभूति गराएको सेवाग्राही स्थानीयको भनाइ छ । पोखरामा बसेर गाउँकै सरकारी सेवा पाउँदा भैखु विक र जालवीर पुन मात्र होइन, उनीहरू जस्तै अन्नपूर्ण–९ स्थायी घर भएर पोखरा बस्ने धेरैजना हर्षित भए ।

अन्नपूर्ण गाउँपालिका–९ को वडा कार्यालयले गाउँपालिकाको सेवालाई नागरिकको घरदैलोसम्म पु¥याउने उद्देश्यले घुम्ती सेवा शिविर आयोजना गरेको अन्नपूर्ण–९ का वडाध्यक्ष रमेश गुरुङले जानकारी दिए । उनका अनुसार अधिकांश स्थानीय बासिन्दाहरू पोखरामा बस्ने भएकाले गाउँसम्म पुगेर सेवा लिन कठिन छ । विशेषगरी नयाँ प्रविधि (सूत्र) मार्फत मालपोत कर तिर्ने प्रक्रियामा हुने ढिलाइ र भौगोलिक विकटताका कारण सेवाग्राहीलाई असहजता नहोस् भन्ने वडा कार्यालयको उद्देश्य रहेको वडाध्यक्ष गुरुङले बताए ।

बसाइसराइ नगर्नुहोस्, कम्तीमा वर्षमा एकपटक हामी तपाईंहरूकै ठाउँमा आएर काम गरिदिन्छौँ भनेर यो व्यवस्था गरेका हौं, : रमेश गुरुङ, वडाध्यक्ष, अन्नपूर्ण ९

पोखरा बस्ने अन्नपूर्ण–९ का स्थानीयलाई पोखरामा सेवा दिँदा बसाइसराइ दर कम हुने वडाध्यक्ष गुरुङको विश्वास छ । ‘जनतालाई बसाइसराइ नगर्नुहोस्, कम्तीमा वर्षमा एकपटक हामी तपाईंहरूकै ठाउँमा आएर काम गरिदिन्छौँ भनेर यो व्यवस्था गरेका हौँ,’ उनले भने, ‘कमसेकम आफ्ना वडाबासीले बसाइसराइ प्रमाणपत्र लिनुभएन भने कुनै दिन गाउँ फर्कनुहोला भन्ने पनि सोंचेका छौं ।’ पोखरामा अन्नपूर्ण गाउँपालिका–९ का १ सयको हाराहारीको घरधुरीका करिब ३ सय नागरिक पोखरामा रहेको उनले बताए ।

बाढीपहिरोका कारण गाउँ जाने बाटो मोदी खोलाले बगाएकाले पनि सेवा शिविर आवश्यक रहेको वडाध्यक्ष गुरुङले बताए । आफू निर्वाचित भएदेखि नै सुरु गरिएको घुम्ती शिविर यो वर्ष बाढीपहिरोले बाटो बिगारेका पछि अति आवश्यक देखिएको उनले सुनाए । भदौ ४ देखि सुरु भएको घुम्ती शिविर ३ दिन पोखरामा सञ्चालन गरिएको उनले जानकारी दिए ।

पोखरामा सञ्चालन भएको शिविर मार्फत ६५ वटा मालपोतसम्बन्धी सेवा प्रदान गरी ५१ हजार रुपैयाँ राजस्व संकलन गरिएको वडाध्यक्ष गुरुङले जानकारी दिए । ५६ वटा सामाजिक सुरक्षा भत्ता नवीकरण तथा अन्य ७ वटा सेवा समेत गरी सेवाग्राहीलाई सहज र छिटो सेवा उपलब्ध गराइएको उनले बताए ।

विशेष गरी सामाजिक सुरक्षा भत्ता नवीकरण, मालपोत कर संकलन र विभिन्न प्रकारका सिफारिसहरू लिन वडासम्म पुग्न नपरोस् भन्ने उद्देश्यले यो शिविर आयोजना गरिएको वडा सचिव किरणप्रसाद शर्माले बताए । शर्माका अनुसार, शिविरमा पञ्जीकरणका कामहरू जन्म दर्ता, विवाह दर्ता, मृत्यु दर्ता र बसाइसराइका साथै नागरिकता र घरबाटो सिफारिसका कामहरू पनि भए । ‘हामीले जनतालाई उहाँहरूकै घरदैलोमा सामाजिक सुरक्षा भत्ता नवीकरण, मालपोत कर तथा तिरो संकलन र वडाबाट प्रवाह हुने अन्य सिफारिसहरू दिने उद्देश्यले यो सेवा शिविर सञ्चालन गरेका हौँ,’ वडा सचिव शर्माले भने, ‘भत्ताका लागि उमेर पुगेकाहरूको नयाँ इन्ट्रीको काम पनि हामीले यहीँबाट गरेका थियौं ।’

घुम्ती सेवा शिविर सञ्चालनका लागि वडाध्यक्ष रमेश गुरुङ, वडा सचिव शर्मा, कार्यपालिका सदस्य पुष्पा पुन, कृषि प्राविधिक लोकमाया पुन र कार्यालय सहयोगी विजमाया पुनको टोली खटिएका थिए ।

कास्कीका ग्रामीण भेगबाट पोखरा आएर बस्ने आफ्ना सेवाग्राहीलाई यहाँको अन्य पालिकाका वडाहरूले पनि घुम्ती सेवा शिविर सञ्चालन गरिरहेका छन् । यहाँको मादी गाउँपालिकाका सिक्लेस, ताङतिङलगायत गाउँका स्थानीयको सहजताका लागि सम्बन्धित वडा कार्यालयले समयसमयमा पोखरामै घुम्ती सेवा शिविरका माध्यमबाट सेवा दिइरहेका छन् ।