काभ्रेको भुम्लु गाउँपालिकामा गएराति भएको गाडी दुर्घटनामा चौरीदेउराली गाउँपालिका–६ का वडाध्यक्षसहित पाँच जना घाइते भएका छन्।
दुर्घटनामा वडाध्यक्ष किशोरराज गिरीको देब्रे खुट्टा भाँचिएको छ। उनको काठमाडौंस्थित ट्रमा सेन्टरमा उपचार भइरहेको जिल्ला प्रहरी कार्यालय काभ्रेका सूचना अधिकारी मिन घलेले जानकारी दिए।
अन्य घाइतेहरू पदमकुमार दुलाल, डिल्लीरसाद गौतम, हाटुजराज गिरी र तेजबहादुर पन्थ सामान्य उपचारपछि अस्पतालबाट डिस्चार्ज भएका छन्।
प्रहरीका अनुसार दुर्घटना गएराति करिब १० बजे भुम्लु गाउँपालिका–८, पौवास्थित उकालोमा भएको हो। चौरीदेउरालीबाट काठमाडौंतर्फ जाँदै गरेको बा १५ च ८५६३ नम्बरको बोलेरो जिप ब्रेक फेल भएर माटोको ढिस्कोमा ठोक्किएको बताइएको छ।
गाडीका चालक पाँचखाल नगरपालिका–५ निवासी युनिस गौतम भने सकुशल रहेका छन्।
