बिहीबार नेपालको सेयर बजार करिब ४ महिनाकै उच्च बिन्दुमा पुगेको छ। नेपाल स्टक एक्सचेञ्ज (नेप्से) परिसूचक अघिल्लो दिनको तुलनामा २५.८९ अंक बढेर २७३१ बिन्दुमा कायम भएको छ। यो अंक गत २८ फागुन २०८१ पछिकै उच्च हो, जुन दिन नेप्से २७३६ बिन्दुमा थियो। त्यसयता बजार २७३० बिन्दुभन्दा तल रहँदै आएको थियो।
आज सेयर बजारमा कारोबार रकममा पनि वृद्धि भएको छ। अघिल्लो दिन ७ अर्ब ४५ करोडको कारोबार भएकोमा बिहीबार ९ अर्ब ६८ करोडको कारोबार भएको छ। कुल ३११ कम्पनीको कारोबारमा १६१ कम्पनीको सेयर मूल्य बढेको छ भने ८७ कम्पनीको घटेको छ।
वाणिज्य बैंकहरूको सेयरमा बिहीबार पनि उच्च आकर्षण देखिएको छ। नेप्से परिसूचक समग्रमा ०.९५ प्रतिशतले बढ्दा वाणिज्य बैंक समूहको परिसूचक सबैभन्दा धेरै ३.०२ प्रतिशतले उकालो लागेको छ। अन्य समूहहरूमा विकास बैंक १.१२ प्रतिशत, फाइनान्स ०.५१ प्रतिशत, होटल तथा पर्यटन ०.१४ प्रतिशत, लगानी ०.३५ प्रतिशत, जीवन बीमा ०.१९ प्रतिशत, उत्पादन तथा प्रशोधन ०.४५ प्रतिशत, माइक्रोफाइनान्स १.४६ प्रतिशत, निर्जीवन बीमा ०.२७ प्रतिशत र अन्य समूह ०.१७ प्रतिशतले बढे। यद्यपि, व्यापार समूह ०.५३ प्रतिशत र हाइड्रोपावर समूह ०.२२ प्रतिशतले घटे।
प्रतिशतका आधारमा सेयर मूल्य सबैभन्दा धेरै बढ्ने कम्पनीमा माइखोला हाइड्रोपावर (८.१५ प्रतिशत), माण्डु हाइड्रोपावर (६.७६ प्रतिशत), समता घरेलु लघुवित्त (६.५७ प्रतिशत), भगवती हाइड्रोपावर (६.५२ प्रतिशत) र सानिमा बैंक (४.८० प्रतिशत) अग्रस्थानमा रहे। वाणिज्य बैंकहरूमा सानिमा बैंकपछि नेपाल एसबीआई, लक्ष्मी सनराइज बैंक, सिद्धार्थ बैंक, प्राइम कमर्सियल बैंक, नेपाल इन्भेस्टमेन्ट मेगा बैंक, माछापुच्छ्रे बैंक, ग्लोबल आईएमई बैंक र कृषि विकास बैंकको सेयर मूल्य ३.४५ प्रतिशतभन्दा धेरैले बढेको छ।
प्रतिशतका आधारमा सेयर मूल्य सबैभन्दा धेरै घट्नेमा करपोरेट डेभलपमेन्ट बैंक (९.९ प्रतिशत), राप्ती हाइड्रो (६.४ प्रतिशत), सिन्धु विकास बैंक (४.३ प्रतिशत) र पन्चकन्या माइ हाइड्रोपावर (४.३ प्रतिशत) रहे।
कारोबार रकमका आधारमा शीर्ष पाँच कम्पनीमा एनआरएन इन्फ्रास्ट्रक्चर, बुटवल पावर, सानिमा बैंक, सप्तकोशी विकास बैंक र सीईडीबी होल्डिङ्स रहे। बजारको कुल पुँजीकरण ४५ खर्ब ५१ अर्ब रुपैयाँ पुगेको छ।
