साउन १८,
महानगरपालिकाले यसअघि साउन १८ गते अन्तिम नामावली प्रकाशन गर्ने तयारी गरेको थियो । बसपार्क क्षेत्रमा बसोबास गरिरहेका सुकुम्बासी तथा अव्यवस्थित बसोबासीको निवेदन तथा कागजात छानबिन गरी साउन २ गते ५ सय ७४ परिवार समेटिएको प्रारम्भिक नामावली प्रकाशित गरिएको थियो ।
उक्त नामावलीमाथि परेका दाबी विरोधका १४६ निवेदनहरुमाथि अहिले अध्ययन भइरहेको छ । ‘प्राप्त १४६ निवेदनहरु उपर अध्ययन भइरहेको छ,’ महानगरपालिकाद्वारा जारी सूचनामा भनिएको छ, ‘यस सम्बन्धमा भूमिहीन तथा अव्यवस्थित बसोबासी सरोकार सहजीकरण समिति र अन्य सरोकारवालाहरुसँग थप छलफल गरी अन्तिम नामावली साउन २२ गतेसम्म प्रकाशन गरिने छ ।’
बसपार्कमा बसोबास गर्ने वास्तविक सुकुम्बासी पहिचान गर्न जेठ १२ मा तीनवटा समिति बनाइएको थियो । पूर्व न्यायाधीश शंकर बराल संयोजकत्वको समितिले बसपार्कको जग्गाको अवस्था पहिचान गरी प्रतिवेदन बुझाइसकेको छ । त्यस्तै वडा नम्बर १७ की वडाध्यक्ष राधिका शाही योगी संयोजकत्वको समितिले वैकल्पिक जग्गाको खोजी गरेको थियो । प्रशासन महाशाखा प्रमुख कृष्णप्रसाद तिवारीको नेतृत्वमा रहेको सहजीकरण समितिले ५ सय ७२ जनाको दाबीमाथि छानबिन गरेको थियो ।
पोखरा बसपार्क निर्माणका लागि २०३२ सालमा १ सय ९६ रोपनी जग्गा अधिग्रहण गरिएको थियो । अतिक्रमणका कारण अहिले १ सय ८७ रोपनी जग्गा मात्र बाँकी छ । त्यसमध्ये २६ रोपनी क्षेत्र मात्र महानगरको पूर्ण नियन्त्रणमा छ । महानगरपालिकाले बसपार्कको उत्तरी र पश्चिमतर्फका ५ सय २० संरचना हटाइसकेको छ । मुख्य बस्तीका सुकुम्बासीले भने विकल्प नदिएसम्म ठाउँ खाली नगर्ने भन्दै अदालतबाट अन्तरिम आदेश ल्याएका थिए ।
