नेकपा माओवादी केन्द्र निकट विद्यार्थी संगठन अखिल क्रान्तिकारीले त्रिभुवन विश्वविद्यालय (त्रिवि) का उपकुलपतिसहितका पदाधिकारीहरूलाई विश्वविद्यालय प्रवेशमा रोक लगाएको छ।
सर्वोच्च अदालतले बुधबार त्रिविमा लगाइएको ताला तत्काल खोल्न आदेश जारी गरेको थियो। सो आदेशमा गृह मन्त्रालय, प्रहरी प्रधान कार्यालय, जिल्ला प्रशासन कार्यालय, र कीर्तिपुर प्रहरी वृत्तको नाममा ताला खोल्न अन्तरिम आदेश दिइएको थियो। सोही अनुसार शुक्रबार बिहान आंशिक प्राध्यापकहरू, नेपाल विद्यार्थी संघ (नेविसंघ) निकट विद्यार्थीहरू, र अखिल क्रान्तिकारीले लगाएको ताला खोलिएको थियो।
तर, ताला खुल्नासाथ अखिल क्रान्तिकारीले पदाधिकारीहरूलाई विश्वविद्यालय प्रवेशमा रोक लगाएको हो। संगठनका त्रिवि कार्यवाहक अध्यक्ष शिवराज भट्टले विज्ञप्ति जारी गर्दै मागहरू पूरा नहुँदासम्म पदाधिकारीहरूलाई प्रवेश निषेध गरिएको जनाएका छन्।
