९ असार । प्रतिनिधि सभाको बैठकमा राष्ट्रिय स्वतन्त्र पार्टी (रास्वपा)का सांसदहरूले आज पनि नाराबाजी गरेका छन् । तर, सभामुख देवराज घिमिरेले बैठक नियमित रूपमा सञ्चालन गरेका छन् ।
सभामुख घिमिरेले बैठक सुरु भएको जानकारी गराएलगत्तै रास्वपा सांसदहरू आ–आफ्नो स्थानबाट उठेका थिए । तर, बैठक नरोकिएपछि उनीहरूले वेल घेराउ गरेका छन् ।
प्रतिनिधि सभाको बैठकमा विभिन्न मन्त्रालयगत बजेटमाथि छलफल गर्ने र छलफलका क्रममा उठेका प्रश्नहरूको जवाफ तथा स्पष्टीकरण दिने कार्यसूची रहेको छ ।
कार्यसूचीअनुसार ऊर्जा, जलस्रोत तथा सिँचाइ, वन तथा वातावरण, संघीय मामिला तथा सामान्य प्रशासन, रक्षा, कृषि तथा पशुपन्छी विकास, स्वास्थ्य तथा जनसंख्या, कानुन, न्याय तथा संसदीय मामिला, र संस्कृति, पर्यटन तथा नागरिक उड्डयन मन्त्रालयको बजेटमाथि छलफल गरी सम्बन्धित मन्त्रीहरूले जवाफ दिने उल्लेख गरिएको छ ।
त्यसैगरी, युवा तथा खेलकुद, भौतिक पूर्वाधार तथा यातायात, महिला, बालबालिका तथा ज्येष्ठ नागरिक, उद्योग, वाणिज्य तथा आपूर्ति, भूमि व्यवस्था, सहकारी तथा गरिबी निवारण, खानेपानी, शिक्षा, विज्ञान तथा प्रविधि, परराष्ट्र, श्रम, रोजगार तथा सामाजिक सुरक्षा, गृह, र सञ्चार तथा सूचना प्रविधि मन्त्रालयका शीर्षकमाथि पनि छलफलका क्रममा उठेका प्रश्नहरूको सम्बन्धित मन्त्रीहरूले जवाफ दिने कार्यसूची रहेको छ ।
