गुल्मी जिल्लाको छत्रकोट गाउँपालिकाले ‘स्थानीय सरकार सारथी’ कार्यक्रम अन्तर्गत ५० वर्ष पुगेका एकल महिला तथा पुरुषलाई जीवन निर्वाह भत्ता दिने भएको छ।
गाउँपालिकाले आर्थिक वर्ष २०८२/०८३ को नीति कार्यक्रममा समाजका ज्येष्ठ नागरिक र एकल जीवन बिताइरहेका नागरिकलाई सम्मानसहित जीवन यापन गर्न सकिने वातावरण सिर्जना गर्ने उद्देश्य राखेको छ।
५० वर्ष उमेर नाघेका तर एकल महिला तथा पुरुषलाई लक्षित गरी ‘जीवननिर्वाह सारथी भत्ता’ उपलब्ध गराइनेछ, छत्रकोट गाउँपालिकाका अध्यक्ष रामप्रसाद पाण्डेले जानकारी दिए।
अध्यक्ष पाण्डेका अनुसार, “सारथी कार्यक्रमले स्थानीय सरकारको सामाजिक उत्तरदायित्वलाई सुदृढ पार्नेछ र एकल नागरिकहरूको जीवनमा सम्मान तथा आत्मबल थप गर्नेछ।”
गाउँपालिकाले यस कार्यक्रमलाई क्रमिक रूपमा विस्तार गर्दै आवश्यकताअनुसार सेवा समायोजन गर्ने योजना पनि बनाएको छ।
