दोस्रो विश्वयुद्धका क्रममा जापानी सेनाले आफ्नै सैनिकहरूमाथि लामखुट्टेबाट सर्ने रोगहरूको अमानवीय परीक्षण गरेको तथ्य सार्वजनिक भएको छ । चीनको हेलुङजियाङ प्रान्तको राजधानी हार्बिनस्थित जापानी सेनाको युनिट ७३१ द्वारा गरिएका अपराधका प्रमाणहरू संकलित प्रदर्शनी केन्द्रले बिहीवार सार्वजनिक गरेको नयाँ अध्ययन प्रतिवेदनले यस्तो खुलासा गरेको हो । अध्ययनकाअनुसार दोस्रो विश्वयुद्धको समयमा चीनमा रहेका जापानी सेनाका दुई प्रमुख जैविक युद्ध एकाइहरू–हार्बिनस्थित ‘युनिट ७३१’ र बेइजिङस्थित ‘युनिट १८५५’–का साथै जापानका अन्य सैन्य चिकित्सा संस्थाहरूले लामखुट्टे, उपियाँ र झिंगा प्रयोग गरी कीटाणुजन्य हतियारको अनुसन्धान गरेका थिए ।
प्रतिवेदनले उल्लेख गरेअनुसार ती जैविक युद्ध एकाइहरूले रोग फैलाउने कीटहरूमाथि विस्तृत अनुसन्धान गर्न समर्पित विभागहरू नै स्थापना गरेका थिए । उनीहरूले प्लेग सार्न उपियाँ, हैजा फैलाउन झिंगा र मलेरियाका लागि मुख्य वाहकका रूपमा लामखुट्टेको प्रयोग गरेका थिए । प्रदर्शनी केन्द्रका अनुसन्धानकर्ता जीन सिचेङका अनुसार, सन् १९४० को मेदेखि अगस्टसम्म मलेरिया संक्रमित लामखुट्टे प्रयोग गरी गरिएको मानव परीक्षणको दस्तावेज सन् १९४३ जनवरी १० मा जापानी आर्मी मेडिकल कोरको जर्नलमा प्रकाशित भएको थियो ।
जापानको चिबा प्रान्तस्थित एक सैन्य अस्पतालमा गरिएको सो परीक्षणमा, सुरुमा चीनमा मलेरिया संक्रमित भएका सैनिकहरूलाई लामखुट्टे टोकाइएको थियो । त्यसपछि ती संक्रमित लामखुट्टेहरूलाई मानसिक रोगका कारण अस्पतालमा भर्ना भएका १० जना जापानी सैनिकहरूलाई टोकाएर संक्रमण फैलाइएको थियो । परीक्षणका क्रममा विषय बनाइएका ती सैनिकहरूमा ४० डिग्री सेल्सियसभन्दा बढी ज्वरो आउने, टाउको दुख्ने र खानामा अरुचि हुने जस्ता गम्भीर लक्षणहरू देखिएका थिए ।
‘यो घटनाले मानव जातिलाई केवल ‘प्रयोगात्मक सामग्री’ का रूपमा प्रयोग गर्ने जापानी सेनाको आपराधिक चरित्रलाई उजागर गर्दछ । अनुसन्धानकर्ता जीनले भने । ‘यसले जैविक हतियारको परीक्षण जापानको मुख्य भूमिसम्म फैलिएको र उनीहरूले आफ्नै सैनिकहरूलाई समेत नछोडेको पुष्टि गर्दछ ।’
अध्ययनले जापानी फौजले जैविक हतियारको अनुसन्धानका लागि विभिन्न निकायहरूबीच समन्वय र सहकार्य गर्ने गरेको समेत खुलासा गरेको छ ।
