२०८३ साउन २१
पोखरा । पोखरा ट्रेड मल एण्ड हाउजिङ प्रालिले १४ औं वार्षिकोत्सव २०८३मा विशाल महोत्सव गर्न लागेको छ । पोखरा ९ चिप्लेढुंगामा रहेको मलले व्यवसायीसँगको सहकार्यमा साउन २२ देखि २४ गतेसम्म महोत्सव गर्न लागेको प्रालिका अध्यक्ष दीपककुमार मुल्मीले जानकारी दिए ।
उनले महोत्सवका कार्यक्रम अन्तर्गत आकर्षक फुड कोर्ट सञ्चालन गर्ने बताए । ‘खानाका परिकारका स्टलहरुमा स्थानीयदेखि अन्तर्राष्ट्रिय परिकारहरुको स्वाद लिन सकिन्छ,’ उनले भने, ‘महोत्सवमा चर्चित कलाकारहरुको सांगीतिक प्रस्तुति तथा मनोरञ्जनात्मक कार्यक्रम आयोजना गरिनेछन् ।’ उनले महोत्सवमा मलमा रहेका विभिन्न प्रतिष्ठित ब्राण्डका सामान व्यवसायीले विशेष छुुटमा विक्रि गर्ने जनाए । महोत्सवमा आकर्षक विक्रि योजना ल्याउने उनले उल्लेख गरे ।
अध्यक्ष मुल्मीले महोत्सवले ग्राहकलाई आवश्यक सामान किनमेल, मनोरञ्जन तथा पारिवारिक रमाइलो वातावरण प्रदान गर्ने दाबी गरे । पोखरा मलका प्रबन्ध निर्देशक सौगात थापाले वार्षिकोत्सवमा यसभन्दा अघि रक्तदान, विद्यालयस्तरीय वक्तृत्वकला संस्थागत सामाजिक उत्तरदायित्वका कार्यक्रम गर्दै आएकोमा यो वर्ष यो पटक विशाल महोत्सव गर्न लागेको बताए । महोत्सवका सबै कार्यक्रम मलको भुइँतलामा गर्ने जानकारी दिँदै महोत्सवमार्फत ग्राहक, व्यवसायी र मनोरञ्जन क्षेत्रबीचको सम्बन्ध अझ प्रगाढ हुने उल्लेख गरे । उनले महोत्सवले स्थानीय व्यापार प्रवद्र्धन, बजारलाई थप चलायमान बनाउन र आर्थिक गतिविधिमा सकारात्मक योगदान पुग्ने विश्वास व्यक्त गरे । उनले महोत्सव पोखराबासीको लागि आकर्षक केन्द्र बन्ने दाबी गरे ।
पोखरा मलले गत वर्ष विशाल व्यापार महोत्सव गरेको थियो । २०७२ असोज २६ देखि औपचारिक रुपमा सञ्चालनमा आएको पोखरा मलमा ५०० भन्दा बढि व्यापारिक सटर छन् । पोखराका विभिन्न स्थानमा पेसा–व्यवसाय गर्ने व्यक्तिहरूको सामूहिक लगानीमा निर्मित मलमा सुनचाँदीका गरगहना, रेडिमेट तथा फेन्सी कपडा, कस्मेटिक, खाद्यान्न, इलेक्ट्रोनिकलगायत वस्तु खरिद गर्न सकिन्छ । मलमा मनोरञ्जनका लागि मल्टिप्लेक्स चलचित्र घर, रेस्टुरेन्ट, हेयर सैलुन, पार्लर, शैक्षिक परामर्श केन्द्र, स्कीन केयर सम्बन्धी अस्पतालले पनि विशेषज्ञ सेवा प्रदान गरेको छ ।
ग्राहकका लागि पर्याप्त र सुरक्षित पार्किङको व्यवस्था गरिएको मलमा ग्राहकको सुविधाका लागि आरामदायी लबी, शौचालय, आवश्यकताअनुसार एस्कलेटर, लिफ्टको व्यवस्था गरिएको प्रबन्ध निर्देशक थापाले जानकारी दिए । उनका अनुसार भूकम्प प्रतिरोधी भवनमा फायर फाइटिङ लगायतका आधुनिक सुरक्षा उपकरण जडान गरिएका छन् ।
