भारतसँगको सीमावर्ती रुपैडिहा बजारमा भारु ९७ रुपैयाँ अर्थात् नेपाली १५५ रुपैयाँ २० पैसामै एक लिटर पेट्रोल पाइन्छ। उत्तर प्रदेशको रुपैडिहा वारिपट्टिको नेपालगन्जमा पेट्रोलको मूल्य २१६ रुपैयाँ ५० पैसा छ।
अर्थात् खुला सीमाबाट भारततर्फ छ किलोमिटर यात्रा गर्दा नेपालभन्दा ६१ रुपैयाँ सस्तोमा पेट्रोल पाइन्छ। नेपालका सीमावर्ती भारतीय बजारमा नेपाली बजारमाभन्दा ५० देखि ६० रुपैयाँसम्म सस्तो पेट्रोल पाइने भएपछि सीमा क्षेत्रका भारतीय पम्पहरूमा इन्धन भर्न नेपाली सवारी साधनहरूको भीड नै लाग्न थालेको बताइएको छ। तर नेपालमाभन्दा सस्तो भए पनि नेपालमा जस्तो भारतीय पेट्रोल पम्पहरूमा सहजै इन्धन भर्न नपाइने अनुभवीहरूले बताएका छन्। भारतमै इन्धन अभाव हुँदा सस्तोमा इन्धन पाइने लोभमा त्यहाँ पुगेका कतिपय नेपालीहरू घण्टौँ लाम बस्न बाध्य भएका त कोही रित्तै फर्कनु परेको भुक्तभोगीहरू सुनाउँछन्।
नेपालगन्जको सीमापारि रहेको रुपैडिहा बजारका कतिपय पेट्रोल पम्पहरूमा डिजेल र पेट्रोल नरहेको सूचना टाँस गरिएको छ। पेट्रोल वितरण भइरहेका पम्पहरूमा गाडी र मोटरसाइकलको लामो लाइन देखिन्छ। नेपालसँग सीमा जोडिएका भारतीय राज्यहरू उत्तर प्रदेश, बिहार, पश्चिम बङ्गाल र उत्तराखण्डका अधिकांश सीमावर्ती बजारसम्म नेपाली सवारी साधनहरूलाई बिना इजाजत लैजान अनुमति दिइने गरिएको छ। भारतसम्म किनमेल र अन्य कामका लागि पुग्ने नेपालीहरू भारतीय पम्पमा इन्धन भरेर फर्कने गरेका छन्। कतिपय नेपालीहरू पेट्रोल हाल्नकै लागि रुपैडिहा पुगे पनि नेपाली नम्बरको गाडीलाई पेट्रोल नदिइने जानकारी पाएर त्यसै फर्किएको बताउँछन्।
