ग्लोबल फाइनान्स म्यागजिन एसिया प्यासिफिकले सन् २०२५ का लागि नेपालको ग्लोबल आईएमई बैंकलाई उत्कृष्ट बैंकको उपाधिबाट सम्मानित गरेको छ।
यो प्रतिष्ठित पुरस्कार प्रत्येक वर्ष एसिया प्यासिफिक क्षेत्रका शीर्ष बैंकहरूलाई प्रदान गरिन्छ। म्यागजिनको ३२औं संस्करणमा पनि नेपालको तर्फबाट ग्लोबल आईएमई बैंकले लगातार दोस्रो वर्ष यो मान्यता प्राप्त गरेको हो।
बैंकका प्रमुख कार्यकारी अधिकृत सुरेन्द्रराज रेग्मीले भने, “लगातार दुई वर्ष यो उपाधि प्राप्त गर्नुले हाम्रो बलियो प्रदर्शन, रणनीतिक दृष्टिकोण र ग्राहकप्रतिको समर्पणलाई झल्काउँछ।”
उनका अनुसार डिजिटल बैंकिङ क्षमता विस्तार, खुद्रा तथा साना तथा मझौला उद्यम (एसएमई) सेवाको सुदृढीकरण र वित्तीय समावेशितालाई प्राथमिकता दिनु बैंकको प्रगतिको प्रमुख कारण हो। रेग्मीले यो उपाधिले नेपालभर बैंकिङ सेवालाई थप प्रभावकारी बनाउन प्रेरणा प्रदान गरेको बताए।
ग्लोबल आईएमई बैंकले देशभरका ग्राहकहरूलाई नवीन र समावेशी बैंकिङ सेवा प्रदान गर्दै आएको छ। यो पुरस्कारले बैंकको उत्कृष्टता र ग्राहकमुखी सेवाप्रति प्रतिबद्धतालाई थप पुष्टि गरेको छ।
