चितवनका सात वटा पालिकामध्ये सबैभन्दा कम बेरुजु कालिका नगरपालिकामा रहेको पाइएको छ।महालेखा परीक्षकको कार्यालयले सार्वजनिक गरेको आर्थिक वर्ष २०८०/८१ को लेखापरीक्षण प्रतिवेदन अनुसार, कालिका नगरपालिकाको कुल बेरुजु रकम ५ करोड ६६ लाख ७९ हजार ३१७ रुपैयाँ रहेको छ। सो नगरपालिकाको गत आर्थिक वर्षको कुल बजेट १ अर्ब ७७ करोड ८६ लाख भएकोमा मात्र ०.८३ प्रतिशत बेरुजु देखिएको छ।
गत वर्ष कालिकाको बेरुजु रकम १ करोड ४६ लाख ६९ हजार ६५९ रुपैयाँ थियो भने अघिल्लो वर्ष फर्स्यौट रकम १३ लाख ३४ हजार ३४२ रुपैयाँ रहेको प्रतिवेदनमा उल्लेख छ। आर्थिक वर्ष २०७९/८० मा कालिकाले १ करोड ३४ लाख फर्स्यौट गरेको थियो। पालिकाको स्थापना भएको आर्थिक वर्ष २०७४/०७५ मा बेरुजु १० करोड २८ लाख रुपैयाँ रहेको थियो भने त्यसयता बेरुजु घटाउने काम तीव्र बनाइएको छ।
नगरप्रमुख विनोद रेग्मीका अनुसार, आगामी दिनमा हरेक आर्थिक वर्षको बेरुजुलाई शून्य बनाउने र बाँकी बेरुजुलाई क्रमिक रूपमा घटाउने नीति अनुरूप काम भइरहेको छ। नगरपालिकाका वरिष्ठ लेखा अधिकृत ऋषिप्रसाद कडुवालले पनि नीति तथा कानुनको पालना गर्दै बेरुजु घटाउन प्राथमिकता दिइएको जानकारी दिए।
जिल्लाको एक मात्र महानगरपालिका भरतपुरको बेरुजु १ अर्ब ३ करोड ५३ लाख ८ हजार रहेको छ। आर्थिक वर्ष २०७९/८० मा मात्र ५ लाख १५ हजार बेरुजु थपिएको थियो। गत आर्थिक वर्षमा बेरुजु ०.९ प्रतिशत रहेको भए पनि फर्स्यौट रकम ० रुपैयाँ देखिएको छ।
रत्ननगर नगरपालिकाले गत आर्थिक वर्ष २०८०/८१ मा ६ करोड ६४ लाख बेरुजु फर्स्यौट गरेको छ। सो पालिकाको कुल बजेट २ अर्ब ९४ करोडको लेखापरीक्षण गर्दा ०.१७ प्रतिशत बेरुजु देखिएको थियो। आर्थिक वर्ष २०७९/८० सम्म १६ करोड १८ लाख बेरुजु रहेको र गत वर्ष थपिएपछि अब १० करोड २ लाख मात्र बेरुजु बाँकी छ।
राप्ती नगरपालिकामा भने आर्थिक वर्ष २०८०/८१ मा मात्र १६ करोड ७३ लाख ७७ हजार ८०८ रुपैयाँ बेरुजु थपिएर कुल बेरुजु ३६ करोड ३ लाख ७१ हजार पुगेको छ। गत वर्ष सो पालिकाले एक रुपैयाँ पनि फर्स्यौट गरेको छैन। यहाँको बेरुजु प्रतिशत ७.९८ रहेको छ।
खैरहनी नगरपालिकाको बेरुजु १२ करोड ८५ लाख ३ हजार रहेको छ भने गत वर्ष १ करोड १६ लाख ६० हजार बेरुजु थपिएको छ। माडी नगरपालिकामा ४८ करोड १४ लाख ७३ हजार ९८६ रुपैयाँ बेरुजु छ भने इच्छाकामना गाउँपालिकामा पनि ११ करोड भन्दा बढी बेरुजु रहेको छ।
समग्रमा चितवनका पालिकाहरूले बेरुजु घटाउन विभिन्न रणनीतिहरू अपनाइरहेको अवस्थामा कालिका नगरपालिकाको बेरुजु सबैभन्दा कम देखिएको छ।
