२६ जेठ, २०८२ “वक्त वक्त की बात” – हिन्दीको यो उखान क्रान्तिकारी कम्युनिस्ट नेता मोहन वैद्य ‘किरण’को जीवनमा सटीक लाग्छ। कुनै बेला ज्यान हत्केलामा राखेर राज्यसत्ताविरुद्ध रणमैदानमा होमिएका यी जोदाहा योद्धा अचेल अस्पतालको आईसीयू शय्यामा जीवनको लडाइँ लडिरहेका छन्।
पाँच दशकदेखि निष्ठा र सिद्धान्तको राजनीतिमा अनवरत डुबुल्की मारिरहेका वैद्य ११ दिनदेखि अस्पतालको शय्यामा छन्। लामो समयदेखि दमको रोगले थलिएका क्रान्तिकारी कम्युनिस्ट पार्टी नेपालका महासचिव मोहन वैद्य ‘किरण’ सिकिस्त बिरामी भएको खबर उनको पार्टीले १० दिनसम्म गोप्य राख्यो। परिवारका सदस्य र पार्टीका एकाध नेताबाहेक उनलाई भेट्नेको सङ्ख्या निकै कम छ। उनैलाई आदर्श मानेर राजनीतिमा बामे सरेका कार्यकर्ताहरूलाई समेत यो कुराको अत्तोपत्तो थिएन।
शनिवारसम्म पनि स्वास्थ्यमा सुधार नआएपछि पार्टीले विज्ञप्ति जारी गर्दै वैद्य जेठ १५ गतेदेखि अस्पतालमा उपचाररत रहेको जानकारी दियो। समकालीन चल्तीको राजनीतिमा सक्रिय भएको भए उनको बिरामीको खबर लुकाउन खोजे पनि लुक्ने थिएन। तर, आज चुपचाप शय्यामा पल्टिएर जीवन पर्खिरहेका वैद्यको क्रान्तिकारी यात्रा र सङ्घर्षको गाथा अझै पनि प्रेरणादायी छ।
