२०८३ भदौ ६ 
‘विद्यार्थी सचेत भए घर परिवार तथा समुदायमा सकारात्मक प्रभाव पर्ने देखियो,’ उनले भनिन्, ‘स्थानीय समुदाय सचेत र संगठित भएको डेंगी रोग रोकथाम तथा नियन्त्रणको काम प्रभावकारी हुन्छ ।’ उनले पालिका, उपशाखा तथा विद्यालय स्तरमा सञ्जाल भएको रेडक्रसले युवा तथा जुनियर सर्कल मार्फत प्रभावकारी काम गर्न सक्ने जानकारी दिइन् ।
कास्कीका सहायक प्रमुख जिल्ला अधिकारी चित्रांगत बरालले डेंगीको संक्रमण रोकथाम तथा नियन्त्रणको लागि अन्तर सरकारी निकायको समन्वयमा जोड दिने बताए । डेंगीबाट बच्न लामखुट्टेबाट जोगिने र सरसफाइमा ध्यान दिन पर्ने उल्लेख गर्दै उनले डेंगीको संक्रमण रोकथाम तथा नियन्त्रणको लागि लामखुट्टेको लार्भा खोज तथा नष्ट अभियानलाई प्रभावकारी बनाउनु पर्नेमा जोड दिए ।
गण्डकी प्रादेशिक जनस्वास्थ्य कार्यालयका जनस्वास्थ्य अधिकृत समिक्षा गैरेले अहिलेसम्म गण्डकी प्रदेशमा १ हजार १० जना डेंगुबाट संक्रमित भएको जानकारी दिइन् । उनले सबभन्दा धेरै बागलुङमा ४ सय ७० र कास्कीमा २सय २२ संक्रमित भएको बताइन् । उनका अनुसार पोखरा महानगरमा २ सय १३ डेंगुबाट संक्रमित भएका छन् । वर्षातको मौसमको अन्त्यतिर डेंगीले महामारीको रुप लिने जानकारी दिदै उनले विशेष गरी भदौ, असोज र कात्तिक महिनामा डेंगी बढी देखिने बताइन् ।
कार्यक्रममा नेपाल रेडक्रस सोसाइटी केन्द्रीय कार्यालयका निर्देशक पूजा कोइराला, पोखरा महानगरपालिका स्वास्थ्य महाशाखाका जनस्वास्थ्य अधिकृत तेजाखर लम्साल, मादी गाउँपालिका स्वास्थ्य शाखाका जनस्वास्थ्य अधिकृत गोपालचन्द्र बराल, नेपाल रेडक्रस सोसाइटी पोखरा, १७, १५, ८, ५, २ र ३का सभापतिहरु क्रमशः लक्ष्मी अधिकारी, शिवबहादुर भण्डारी, विष्णुप्रसाद बराल, कृष्णप्रसाद कोइराला, विन्दु शर्मा पराजुली, रेडक्रस सोसाइटी पोखरा २५का सचिव रमा त्रिपाठी लगायतले डेंगी संक्रमण रोकथाम तथा नियन्त्रणको बारेमा बोलेका थिए ।
