मर्दी हिमाल पदयात्रामा गएर बेपत्ता भएका तीन युवा मोदी खोलापारि भेटिए

गएको १९ साउनमा मर्दी हिमाल ट्रेकिङका लागि निस्किएका उनीहरु माछापुच्छ्रे गाउँपालिका ९ स्थित बादलडाँडाको जंगलमा अलपत्र परेका थिए । २० साउनको बिहान ८ बजेसम्म सम्पर्कमा रहेका ती युवाहरु त्यसपछि सम्पर्कविहीन भएका थिए । उनीहरु हराएको सूचना पाएपछि बादलडाँडामा होटल सञ्चालन गर्ने प्रेम अधिकारीको नेतृत्वमा ४ जनाको टोली खोजीका लागि खटिएको थियो ।

हराएका युवाहरुको खोजी गर्ने क्रममा २० साउनको साँझ पौने ६ बजे स्थानीयले उनीहरुलाई मोदी खोलापारि देखेका थिए । युवाहरु फेला परेको जानकारी आएपछि घान्द्रुक र बगरबाट प्रहरी टोली तथा सशस्त्र प्रहरीको कालिका गणबाट १० जनाको टोली घटनास्थल पुगेको थियो । खोलामा पानीको बहाव निकै ठूलो भएकाले आइतबार राति अबेरसम्म प्रयास गर्दा पनि उनीहरुलाई वारी ल्याउन सकिएन ।

उद्धारमा खटिएको टोलीले खोलामा फड्के बनाउने र छरिएर बगेको पानीको बहावलाई एकै ठाउँमा पठाउने प्रयास गरेको छ । ‘हामीले खोलामा अस्थायी पुल जस्तो बनाउने र पानीको बहावलाई एकातिर मोडेर उनीहरुलाई तार्ने कोसिस गरिरहेका छौँ,’ उद्धारमा खटिएका एक सुरक्षाकर्मीले भने । खोलाको जोखिम र रातको समय भएकाले आइतबार राति १० बजे उद्धार कार्य स्थगित गरिएको थियो ।

‘खोलापारि रहेका युवाहरुलाई नआत्तिन र सुरक्षित स्थानमा बस्न जानकारी गराएका छौँ,’ उद्धार टोलीले भन्यो । रातको समयमा नेपाल प्रहरीका २ जना, सशस्त्र प्रहरीका ९ जना र नेपाली सेनाका ६ जना गरी १७ जनाको संयुक्त टोली घटनास्थल नजिकै रहेको हाइड्रोपावरको अस्थायी क्याम्पमा बसेको थियो । उनीहरुले रातभर युवाहरुको अवस्थाबारे निगरानी राखेका थिए ।

आज सोमबार बिहान ४:४० बजे वडा प्रहरी कार्यालय बगरबाट प्रहरी निरीक्षक रामप्रसाद सापकोटाको नेतृत्वमा ७ जनाको थप उद्धार टोली घटनास्थलतर्फ गएको छ । अहिले सुरक्षाकर्मीको टोलीले स्थानीय बासिन्दासँगको समन्वयमा युवाहरुलाई सुरक्षित रुपमा खोला तार्ने काम गरिरहेको छ । ती युवाहरुको मोबाइल अफ भएकाले उनीहरुसँग सिधा टेलिफोन सम्पर्क हुन सकेको छैन ।

उद्धार टोलीले खोला वारी र पारिबाट एकआपसमा संकेत र आवाजका माध्यमबाट समन्वय गरिरहेको छ । पदयात्राका क्रममा बाटो बिराएर उनीहरु भिर र जंगलको बीचमा पर्ने मोदी खोलाको किनारमा पुगेको प्रारम्भिक अनुमान गरिएको छ । घटनास्थल बगरस्थित प्रहरी कार्यालयबाट झण्डै ६९ किलोमिटर उत्तरमा पर्छ ।

उद्धार कार्यमा खटिएका टोलीमा भेडावारीबाट प्रहरी हवल्दार जीवन बराल, घान्द्रुकबाट प्रहरी नायब निरीक्षक राजेन्द्र पौडेल र सशस्त्र प्रहरी निरीक्षक साजन श्रेष्ठको टोली पनि सामेल छ । उनीहरुले आफन्त र स्थानीयसँग समन्वय गरी उद्धार कार्यलाई तीव्रता दिएका छन् । युवाहरुको स्वास्थ्य अवस्था सामान्य रहेको र उनीहरुलाई सुरक्षित पोखरा ल्याउने तयारी भइरहेको प्रहरीले जनाएको छ ।