नेकपा एमालेमा पूर्वराष्ट्रपति विद्यादेवी भण्डारीको सक्रिय राजनीतिमा फर्कने घोषणाले ठूलो हलचल मच्चिएको छ। पार्टीभित्र कित्ताकाट र बहस तीव्र बनेको छ, तर नेताहरू खुलेर बोल्न डराइरहेका छन्। एक शीर्ष नेताले भने, “एमाले नेताहरूको हालत महाभारतमा द्रौपदीको वस्त्रहरण हुँदा बोल्न नसक्ने महारथीहरूजस्तै छ। मनमा छ, तर बोल्न सक्दैनन्।”
जनकपुरमा आइतबार पत्रकार सम्मेलनमा नेकपा एमालेका सचिव रघुवीर महासेठले पूर्वराष्ट्रपति भण्डारीलाई सक्रिय राजनीतिमा फर्कनबाट रोक्न नहुने बताए। उनले भने, “उहाँ पार्टीकी वरिष्ठ नेतृ हुनुहुन्छ। संविधान र पार्टी विधानले सक्रिय राजनीतिमा फर्कन कुनै बन्देज लगाएको छैन। उहाँ सक्रिय राजनीतिमा आउन चाहनुहुन्छ भने रोक्ने अधिकार कसैलाई छैन।”
तर, महासेठले पार्टीभित्रको कित्ताकाट स्वीकार्य नहुने र आगामी महाधिवेशनसम्म केपी शर्मा ओली नै निर्विकल्प अध्यक्ष भएको तर्क गरे। उनको यो भनाइले भण्डारीप्रति समर्थन देखिए पनि ओलीप्रति बफादारी कायम राख्ने चतुर अभिव्यक्ति मानिएको छ। गत जेठ १०–१९ मा भण्डारीको नेतृत्वमा भएको चीन भ्रमणमा सहभागी भएका महासेठलाई भण्डारी पक्षधर मान्नेहरू पनि छन्, यद्यपि उनले आफूलाई एमाले पक्षधर भएको प्रष्ट्याएका छन्।
