उज्बेकिस्तानमा जारी एएफसी महिला एसियन कप छनोटअन्तर्गत समूह एफको आफ्नो दोस्रो खेलमा नेपालले आज श्रीलंकासँग प्रतिस्पर्धा गर्दै छ। खेल उज्बेकिस्तानको तास्केन्तस्थित बुनयोदकोर स्टेडियममा नेपाली समयअनुसार साँझ ६:१५ बजे सुरु हुनेछ।
नेपालले आफ्नो पहिलो खेलमा लाओसमाथि ९-० को फराकिलो जित हासिल गरेको थियो। यो खेल नेपाली महिला टोलीको १००औं अन्तर्राष्ट्रिय खेलसमेत थियो, जसमा नयाँ कप्तान सावित्रा भण्डारी साम्बाले नेतृत्व सम्हाल्दै ४ गोल गरेकी थिइन्। उक्त खेलबाट मुख्य प्रशिक्षक प्याट्रिक डि वाइल्डले पनि सिनियर राष्ट्रिय टोलीमा डेब्यू गरेका थिए।
पहिलो खेलको लयलाई दोस्रो खेलमा कायम राख्ने लक्ष्यमा नेपाल रहेको छ। लाओसविरुद्धको खेलमा नियमित गोलकिपर एन्जिला तुम्बापो सुब्बालाई बेन्चमा राखेर अन्जना राना मगरलाई अवसर दिइएको थियो भने सरस्वती हमाललाई पहिलो रोजाइमा डेब्यू गराइएको थियो। प्रीति राई, रेखा पौडेल, पूजा राना लगायतका खेलाडी दोस्रो हाफमा मात्र मैदान प्रवेश गरेका थिए। श्रीलंकाविरुद्धको खेलमा पनि प्रशिक्षकले यस्तै रणनीति अपनाउन सक्ने सम्भावना छ।
उज्बेकिस्तानविरुद्धको अन्तिम खेल निर्णायक हुने भएकाले प्रशिक्षकले सुरुका खेलमा फरक रणनीति प्रयोग गरेको हुन सक्छ। पहिलो खेलमा उत्कृष्ट प्रदर्शन गरेको भन्दै प्रशिक्षक प्याट्रिकले खेलाडीहरूको प्रशंसा गरेका थिए र बाँकी खेलहरूमा पनि यही लय कायम राख्नुपर्ने बताएका छन्।
महिला फुटबलमा नेपाल श्रीलंकासँग हालसम्म अपराजित छ। श्रीलंकासँग खेलेका ८ वटै खेलमा नेपाल विजयी भएको छ। फिफा वरियतामा नेपाल १००औं स्थानमा छ भने श्रीलंका १५९औं स्थानमा छ।
समूह एफमा नेपाल, उज्बेकिस्तान, लाओस र श्रीलंका छन्। यही समूहको अर्को खेलमा उज्बेकिस्तानले श्रीलंकालाई १०-० को फराकिलो अन्तरले पराजित गरेको थियो। फिफा वरियतामा ५१औं स्थानमा रहेको उज्बेकिस्तान समूहको सबैभन्दा बलियो टोली हो। नेपालले हालसम्म उज्बेकिस्तानलाई पराजित गर्न सकेको छैन।
अन्तिम खेल उज्बेकिस्तानसँग भएकाले त्यसअघिका खेलमा प्रत्येक गोल महत्वपूर्ण हुनेछ। पहिलो खेलको नतिजा हेर्दा नेपाल र घरेलु टोली उज्बेकिस्तान नै २०२६ मा अस्ट्रेलियामा हुने एएफसी महिला एसियन कपमा छनोट हुने मुख्य दाबेदार देखिन्छन्। यदि दोस्रो खेलमा नेपाल र उज्बेकिस्तान दुवै विजयी भएमा समूहको अन्तिम खेल निर्णायक हुनेछ।
समूहमा शीर्ष स्थान हासिल गर्ने टोली आगामी वर्ष अस्ट्रेलियामा हुने एएफसी महिला एसियन कपका लागि छनोट हुनेछ। साथै, यो प्रतियोगिताले २०२७ फिफा महिला विश्वकप र २०२८ ओलम्पिक फुटबल प्रतियोगिताको पहिलो चरणको छनोटका लागि पनि ढोका खोल्नेछ।
