“त्रिविको परीक्षा नियन्त्रण कार्यालयका १० सेवा अब अनलाइन, असार १५ देखि लागू”

६ असार २०८२ – त्रिभुवन विश्वविद्यालय, परीक्षा नियन्त्रण कार्यालय (बल्खु) ले आफ्ना १० वटा सेवा अब अनलाइनमार्फत उपलब्ध गराउने भएको छ। यो व्यवस्थाले विद्यार्थीहरूलाई सहजता प्रदान गर्ने अपेक्षा गरिएको छ।

परीक्षा नियन्त्रक पुष्पराज जोशीले असार १५ गतेदेखि अनलाइन सेवाहरू सुरु हुने र विद्यार्थीहरूलाई कार्यालयमा उपस्थित हुनु नपर्ने बताए। उनले भने, “असार १५ देखि अनलाइनबाट सेवा सुरु हुन्छ। कार्यालय आउनै पर्दैन।”

यसअघि परीक्षा नियन्त्रण कार्यालयको सेवा प्रभावकारी नभएको र घण्टौँ लाइन बस्नुपर्ने गुनासो विद्यार्थीहरूबाट आउने गरेको थियो। अनलाइन सेवाले यी समस्यालाई समाधान गर्ने विश्वास गरिएको छ।

अनलाइनमार्फत उपलब्ध हुने सेवाहरू:

1. त्रिवि रजिस्ट्रेशन आवेदन फाराम

2. परीक्षा आवेदन फाराम

3. ट्रान्सक्रिप्ट आवेदन फाराम

4. प्रोभिजनल सर्टिफिकेट

5. मूल प्रमाणपत्र

   

6. पुनर्योगका लागि आवेदन फाराम

7. शैक्षिक कागजातमा नाम, जन्ममिति, रजिस्ट्रेशन आदि सच्चाउने फाराम

8. विभिन्न सिफारिस पत्रहरू

9. प्रमाणपत्रहरूको प्रमाणीकरण

10. प्रतिलिपि ट्रान्सक्रिप्ट र मार्कसिट

यो कदमले विद्यार्थीहरूलाई समय र स्रोतको बचत गर्नुका साथै सेवालाई थप पारदर्शी र प्रभावकारी बनाउने अपेक्षा गरिएको छ।