२०८३ भदौ ५
पोखरा । पोखराका विद्यालयमा अध्ययनरत विद्यार्थीहरू हिजोआज केवल पाठ्यपुस्तकका सिद्धान्तमा मात्रै सीमित छैनन् । उनीहरू देशको शासन व्यवस्था, संघीयताको मर्म र कानुन निर्माणको जटिल प्रक्रियाबारे पनि उत्तिकै घोत्लिन थालेका छन् । शुक्रबार पोखराको लेकसिटी कलेजमा देखिएको दृश्यले यही संकेत गथ्र्यो, जहाँ ८० जनाभन्दा बढी विद्यार्थीहरू संसदीय अभ्यास र खुलापनका विषयमा गम्भीर विमर्श गरिरहेका थिए ।
संसदीय पत्रकार मञ्च गण्डकीको आयोजना तथा लेकसिटी कलेज र प्रदेश सभा सचिवालयको सहकार्यमा भएको ‘युवा लक्षित संसदीय पहुँच’ कार्यक्रममा विद्यार्थीहरूले राज्य सञ्चालनका भित्री पाटाबारे जानकारी लिने मौका पाए ।
प्रदेश सभा सचिवालयका कानुन अधिकृत रामबहादुर थापाले जब नेपालको संघीय शासन प्रणाली र तीन तहको सरकारको कार्यक्षेत्रबारे चर्चा सुरु गरे, विद्यार्थीहरू निकै ध्यान दिएर सुनिरहेका देखिन्थे । थापाले संघीय संसद र प्रदेश सभाको क्षेत्राधिकार मात्रै केलाएनन्, संसदीय कार्यविधि र प्रदेश सभाका विभिन्न विषयगत समितिले कसरी काम गर्छन् भन्ने कुरा पनि छर्लंग पारे । प्रदेश सभामा हुने गतिविधि र कानुन निर्माणका चरणहरू बुझेपछि विद्यार्थीहरूमा थप जिज्ञासा पलाएको देखिन्थ्यो ।
त्रिपाठीले सरकार बाटो बिराएको खण्डमा सचेत गराउने दायित्व सांसदको हुने र सांसदलाई खबरदारी गर्ने दायित्व सचेत नागरिकको हुने उल्लेख गरिन् । उनले संसदीय व्यवस्थामा प्रमुख सचेतकको भूमिका र यसको महत्वबारे पनि विद्यार्थीलाई बुझाइन् ।
लेकसिटी कलेजका अध्यक्ष प्राध्यापक डाक्टर विश्वकल्याण पराजुलीले कलेजले विद्यार्थीलाई व्यवहारिक ज्ञान दिन स्थापनाकालदेखि नै यस्ता कार्यक्रम गर्दै आएको बताए । ‘जनप्रतिनिधिले जनताको चाहना अनुसार काम गरेका छन् कि छैनन् भनेर हेर्न पनि यस्ता कार्यक्रमले विद्यार्थीलाई सहयोग पुर्याउँछ,’ उनले भने । कलेजले नियमित रूपमा ‘लेकसिटी कचहरी’ समेत सञ्चालन गर्दै आएको जानकारी उनले दिए ।
संसदीय पत्रकार मञ्च गण्डकीका पूर्वअध्यक्ष एवं कार्यक्रम संयोजक भरत कोइरालाका अनुसार मञ्चले युवाहरूलाई संसदीय प्रणालीसँग जोड्न निरन्तर काम गरिरहेको छ । यसअघि जनप्रिय कलेज र पश्चिमाञ्चल माविमा पनि यस्तै कार्यक्रम भइसकेका छन् । ‘भोलिको देश सम्हाल्ने भनेकै यी युवाले हो, त्यसैले उनीहरूलाई आजैदेखि संघीयता र संसदीय अभ्यासका बारेमा जानकार बनाउनु हाम्रो उद्देश्य हो,’ कोइरालाले बताए ।
कार्यक्रमको अन्त्यमा उत्प्रेरक उपेन्द्र पौडेलले युवाअवस्था करिअरका बारेमा हुने अलमलबाट कसरी उम्कने र उच्च शिक्षाका लागि कस्ता शैक्षिक संस्था रोज्ने भन्ने बारेमा उत्प्रेरण दिए ।
फेवा शिक्षा सदन, पश्चिमाञ्चल मावि, माउन्ट अन्नपूर्ण, न्यु ग्यालेक्सी र हिल प्वाइन्ट बोर्डिङ स्कुलका विद्यार्थीहरूले यो अन्तरक्रियाबाट नयाँ अनुभव सँगालेका छन् । कार्यक्रममा लेकसिटी कलेजका सहायक क्याम्पस प्रमुख शोभाकान्त सिग्देलले विद्यार्थीलाई स्वागत गर्दै यस्ता छलफलले लोकतन्त्रलाई बलियो बनाउने विश्वास व्यक्त गरे । कक्षाकोठाको थ्योरीबाट बाहिर निस्केर संसदीय अभ्यासको अभ्यास बुझ्न पाउँदा विद्यार्थीहरू उत्साही देखिन्थे । उनीहरूको सक्रियताले भोलिको नेतृत्व थप सचेत र जिम्मेवार हुने आशा जगाएको छ ।
