सर्लाहीको बलरा नगरपालिका–१ मा दुई समूहबीच मदिरा सेवनका क्रममा भएको विवाद झडपमा परिणत हुँदा एक समूहले अर्को समूहमाथि छुरा प्रहार गरेको छ । उक्त घटनामा तीन जना घाइते भएका छन् ।
प्रहरीका अनुसार घाइते हुनेमा सोही वडाका २५ वर्षीय धर्मवीर सहनी, १८ वर्षीय दशरथ सहनी र २५ वर्षीय अमित मण्डल रहेका छन् । धर्मवीरको पेटमा, दशरथको घाँटीमा र अमितको दाहिने हातमा चोट लागेको जनाइएको छ ।
घाइते तीनै जनालाई उपचारका लागि बलरास्थित धुलिखेल अस्पताल पठाइएको छ ।
उनीहरूमाथि छुरा प्रहार गर्नेहरू भारत निवासी अमन सिंह, विकास सिंह, अटल राय र अवशेख सिंह रहेको प्रहरी अनुसन्धानमा खुलेको छ । हाल उनीहरू फरार रहेका छन् र खोजी कार्य जारी रहेको प्रहरीले जनाएको छ ।
