बाराको बारागढी गाउँपालिका–३, सुन्दरपुरमा ऐलानी जग्गा विवादका क्रममा एक व्यक्तिमाथि कोदालो प्रहार गरी ज्यान मार्न खोजिएको आरोपमा सात जनाविरुद्ध उजुरी दर्ता गरिएको छ।
४० वर्षीय नन्दलाल चौधरी र २७ वर्षीय हरिन्द्र पासवानले जिल्ला प्रहरी कार्यालय बारामा जाहेरी दिँदै २० वर्षदेखि जोतभोग गर्दै आएको ऐलानी जग्गामा जबर्जस्ती घेरा हालेर हत्या प्रयास गरिएको दाबी गरेका हुन्।
उनीहरूले बारागढी–३, नयका टोलका ४७ वर्षीय बिहारी पण्डित, ४० वर्षीय गोरख पण्डित, ६० वर्षीय ओकिल मिया, ३० वर्षीय जमिल अख्तर मिया, ४१ वर्षीय शिवचन्द्र यादव, ३० वर्षीय सलाउद्दीन मिया र २५ वर्षीय अलाउद्दीन मियाविरुद्ध उजुरी दिएका छन्।
जाहेरीअनुसार घटना असार २५ गते दिउँसो साढे १२ बजे भएको हो। रामएकवाल चौधरी सुन्दरपुरस्थित ऐलानी जग्गामा पुगेका बेला जमिल अख्तर मियाले उक्त जग्गा आफ्नो दाबी गर्दै विवाद सुरु गरेका थिए। त्यसक्रममा उनले अन्य व्यक्तिहरूलाई बोलाएर रामएकवाललाई घेरा हालेका थिए।
विवादको दौरान, जाहेरी अनुसार शिवचन्द्र यादवले रामएकवाल चौधरीको टाउकोमा कोदालो प्रहार गरेका थिए। घटनामा रामएकवालका छोरा दिपेन्द्र चौधरीसमेत घाइते भएका छन्।
गम्भीर घाइते रामएकवाल हाल काठमाडौंको न्युरो अस्पतालमा उपचाररत छन्। उनका दाजु चन्देश्वर चौधरीका अनुसार आर्थिक अभावका कारण औषधि किन्नसमेत समस्या भएको छ।
“प्रहरीले प्रतिवादीहरूसँग दुई लाख रुपैयाँ उठाएर उपचारमा सहयोग गर्ने भनेका थिए, तर अहिलेसम्म कुनै सहयोग प्राप्त भएको छैन,” चन्देश्वरले गुनासो गर्दै थपे, “यस्तो गम्भीर घटनामा संलग्न व्यक्तिहरू खुलेआम हिँडिरहेका छन्, तर अहिलेसम्म कसैलाई पक्राउ गरिएको छैन।”
यसबारेमा जिल्ला प्रहरी कार्यालय बाराका प्रहरी उपरीक्षक (एसपी) सन्तोष तामाङले भने आफूलाई जानकारी नभएको प्रतिक्रिया दिएका छन्।
