नेकपा (माओवादी केन्द्र) निकट युवा संगठन योङ कम्युनिस्ट लिग (वाईसीएल) ले मनोहरा खोलाको किनारमा रहेको सुकुम्बासी बस्तीमा अस्थायी तटबन्ध निर्माण गरेको छ। ‘श्रम तथा उत्पादनमा वाईसीएल’ अभियान अन्तर्गत वाईसीएल नेपाल बागमती प्रदेश र विशेष सम्पर्क प्रदेशको संयुक्त आयोजनामा आज बिहान उक्त तटबन्ध निर्माण गरिएको हो।
अभियानमा वाईसीएल नेपाल भक्तपुर र काठमाडौँको पनि सहकार्य रहेको अध्यक्ष पुष्प ओलीले जानकारी दिए। वर्षाको समयमा मनोहरास्थित सुकुम्बासी बस्तीमा बाढी पस्दा जनताले ठूलो सास्ती भोग्नुपरेकोले डुवान रोक्न अस्थायी तटबन्ध निर्माण गरिएको ओलीले बताए।
कार्यक्रममा सहभागी माओवादी केन्द्रका उपमहासचिव तथा युवा संगठनका संयोजक शक्ति बस्नेतले जनतासँगको सम्बन्ध र सहकार्यलाई बलियो बनाउने उद्देश्यले अभियान सञ्चालन गरिएको बताए। उनले भने, ‘वाईसीएल नेपालले श्रम र उत्पादनमा जोड दिने अभियानमार्फत जनताको समस्यामा प्रत्यक्ष सहभागी भइरहेको छ।’
बस्नेतका अनुसार, पछिल्लो समय पार्टीले जनता केन्द्रित जागरण अभियान सञ्चालन गर्दै आएको छ, जसअन्तर्गत वाईसीएल नेपालले श्रम र उत्पादनसँग सम्बन्धित कामहरूमा सक्रियता देखाइरहेको छ। देशव्यापी रूपमा सञ्चालन भइरहेको श्रम र उत्पादन अभियानको यो पनि एक हिस्सा हो।
उनले भक्तपुर र काठमाडौँका पार्टी पंक्तिहरू समेत सो अभियानमा संलग्न रहेको बताए। वाईसीएल नेपालले साउन १ गतेदेखि देशभर श्रम र उत्पादन अभियान सञ्चालन गरिरहेको जानकारी दिइएको छ।
