नेकपा माओवादी केन्द्रकी सांसद ज्ञानु सुवेदी बस्नेतले प्रतिनिधिसभा अन्तर्गतको शिक्षा, विज्ञान तथा प्रविधि समितिको बैठक रोकेर समय मागिनुमा गम्भीर षड्यन्त्र र धन्दा भइरहेको आरोप लगाएकी छन्। आइतबारको समिति बैठकमा बोल्दै उनले यो गम्भीर आरोप लगाएकी हुन्।
उनले भनिन्, “समितिको बैठक बारम्बार स्थगित गरेर समय मागिनुको कारण बुझ्न सकिएको छैन। यो बैठक रोकेर अरू नै धन्दा र षड्यन्त्र भइरहेको अनुभूति भएको छ।” उनले विद्यालय शिक्षा विधेयकमा पाँच दिनको छलफलपछि ६०/४० को सहमति भइसकेको अवस्थामा फेरि समय मागिनु राम्रो संकेत नभएको बताइन्।
सांसद बस्नेतले शिक्षक महासंघको मागलाई आफूहरूले गम्भीर रूपमा लिएको उल्लेख गरिन्। उनले समिति बैठकमा दलको भूमिकालाई लिएर अन्य दलका सांसदहरूले राख्ने कुरा उचित नभएको गुनासो गरिन्। उनले भनिन्, “दलमा आफ्नो भूमिकालाई समितिमा राख्ने मान्यता हुँदैन। हामीले शिक्षक महासंघको कुरालाई गम्भीर रूपमा उठाएका छौं।”
उनले समिति बैठकमा प्रश्न उठाउँदै भनिन्, “अहिले इसीडी शिक्षकको अवस्था के भयो? द्वन्द्वपीडित शिक्षकको विषयमा के भयो?” उनले विद्यालय शिक्षा विधेयकलाई तत्काल अघि बढाउन समितिमा छलफल आवश्यक रहेको माग गरिन्।
