राष्ट्रिय स्वतन्त्र पार्टी (रास्वपा) की सांसद सुमना श्रेष्ठले विद्यालय शिक्षा विधेयकमा विद्यार्थी र अभिभावकको मतलाई वेवास्ता गरिएको आरोप लगाएकी छन्। आइतबार प्रतिनिधिसभा अन्तर्गतको शिक्षा, विज्ञान तथा प्रविधि समितिको बैठकमा बोल्दै उनले विधेयकको मोडालिटीमै प्रश्न उठाइन्।
उनले भनिन्, “शिक्षा र शिक्षकका लागि छुट्टाछुट्टै विधेयक ल्याउनुपर्छ। विधेयकको मुख्य सरोकारवाला विद्यार्थी र अभिभावक हुन्, तर उनीहरूसँग कुनै छलफल गरिएको छैन। बच्चासँग भोटिङ कार्ड नभएर होला, उनीहरूको मतलाई वेवास्ता गरिएको छ।”
श्रेष्ठले विद्यमान पाठ्यक्रमको स्वरूपमा परिवर्तन आवश्यक रहेको बताउँदै विद्यार्थीको प्रतिस्पर्धी क्षमता वृद्धिका लागि पाठ्यक्रम सुधार, पोशाक, अतिरिक्त कक्षा, खेलकुद र अन्य अतिरिक्त क्रियाकलापको व्यवस्था गर्नुपर्ने माग गरिन्। उनले थपिन्, “पाठ्यक्रमको समीक्षा गर्नुपर्छ, यो मेरो माग हो।”
नेपाली कांग्रेसले शिक्षकको बढुवालाई तोकिएको मापदण्डअनुसार बनाउन खोजेको विषयमा शिक्षक महासंघको विरोध रहेको उनले स्मरण गराइन्। उनले भनिन्, “कार्य सम्पादनका लागि ९० अंक तोकिएको छ, तर शिक्षक महासंघले अंक तोक्नै नहुने भन्दै विरोध जनाएको छ।”
उनले शिक्षकको बढुवा र सरुवा तोकिएको मापदण्डमा मात्र आधारित हुन नहुने तर्क राखिन्। “कक्षामा उपस्थिति, वार्षिक योजना निर्माण, र विद्यार्थीको सिकाइ उपलब्धिका आधारमा शिक्षकको बढुवा हुनुपर्छ,” उनले जोड दिइन्।
विद्यालय शिक्षा विधेयक संसदीय समितिबाट पारित नहुँदा संसदमा टेबल हुन सकेको छैन।
