वैदेशिक रोजगार विभागले १८ वटा अभिमुखीकरण तालिम प्रदायक संस्था (ओरिएन्टेसन सेन्टर)हरूलाई स्पष्टीकरण माग गरेको छ। वैदेशिक रोजगारीका लागि जाने श्रमिकहरूलाई अभिमुखीकरण तालिम प्रदान गर्दै आएका ती संस्थाहरूमाथि विभागले अनुगमन गर्दै विभिन्न समस्या भेटिएपछि स्पष्टीकरण सोधिएको हो।
विभागका सूचना अधिकारी टिकाराम ढकालका अनुसार अनुगमनको क्रममा कतिपय संस्थामा भौतिक पूर्वाधारको अभाव, कतिपयमा आवश्यक जनशक्ति नभएको, र केहीको लोकेशन नै फेला नपरेको देखिएको छ।
“एक हप्ताको समय दिइएको छ। स्पष्टीकरण प्राप्त भएपछि कार्यविधिअनुसार चेतावनी दिने, जरिवाना गर्ने वा अनुमति स्थगन गर्ने निर्णय गरिनेछ,” ढकालले बताए।
विभागले यो महिना १०० वटा अभिमुखीकरण केन्द्रहरूको अनुगमन गर्ने तयारी गरेको छ। हाल वैदेशिक रोजगारीका लागि पूर्वप्रस्थान तालिम दिन इजाजत प्राप्त १४३ मध्ये १२५ संस्था मात्र सक्रिय अवस्थामा छन्। बाँकी १८ संस्थाको अनलाइन प्रणाली (आईटी) बन्द गरिएको विभागले जनाएको छ।
काठमाडौं उपत्यकाभित्र रहेका केन्द्रहरूको कार्यालयमै पुगेर अनुगमन गरिएको थियो भने उपत्यकाबाहिरका संस्थाको अनुगमन अनलाइनमार्फत गरिएको हो।
विभागले गत वर्षदेखि ती संस्थाहरूमा ‘आईरिस’ प्रणाली जडान गरेको थियो जसअनुसार अनलाइन अनुगमनको सुविधा उपलब्ध छ। सोही प्रणाली प्रयोग गरी यसपालिको अनुगमन कार्य सम्पन्न गरिएको हो।
