दोलखाको सिंगटी–लामाबगर र लापिलाङ सडक पहिरोका कारण अवरुद्ध भएका छन्।
जिल्ला प्रहरी कार्यालय दोलखाका सूचना अधिकारी श्रीराम तिमल्सिनाका अनुसार, दोलखाको बिगु गाउँपालिका–१ स्थित सोल्टीमोडमा पहिरो खसेपछि सिंगटी–लामाबगर सडकखण्ड अवरुद्ध भएको हो। अहिले सडक खुलाउने प्रयास जारी भए पनि पूर्ण रूपमा सञ्चालनमा आउन केही समय लाग्ने उनले बताएका छन्।
त्यसैगरी, कालिन्चोक गाउँपालिका–६ मा पर्ने लापिलाङतर्फ जाने सडक पनि अवरुद्ध भएको छ। गोदुङ भन्ने स्थानमा राति खहरे खोलाको पानी एकैचोटि बग्दा सडकमा क्षति पुगेको हो।
सडकको भागमा माटोको लेदो र ढुंगा थुप्रिएर आवागमन प्रभावित भएको छ। साथै, सडकको ढलान मुनि समेत भत्किएको हुँदा हाल चारपांग्रे सवारी साधन सञ्चालन गर्न सक्ने अवस्था नरहेको जिल्ला प्रहरी कार्यालय दोलखाले जानकारी दिएको छ।
