वैशाखदेखि असारसम्मको तीन महिनामा देशभर २,०६५ वटा विपद्जन्य घटना भएका छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार, ती घटनाहरूमा परेर ९३ जनाको मृत्यु भएको छ भने २२ जना अझै बेपत्ता छन्।
प्राधिकरणका प्रवक्ता एवं उपसचिव सुरेश सुनारका अनुसार, तीन महिनामा भएका घटनाबाट हालसम्म ४४५ जना घाइते भएका छन्। ती विपद्बाट ४,१३६ परिवार प्रत्यक्ष रूपमा प्रभावित भएको जानकारी उनले दिएका छन्।
प्राधिकरणले बिहीबार सार्वजनिक गरेको २०८२ सालको पछिल्लो तीन महिनाको विवरणअनुसार, बाढीका मात्र १३७ घटना भएका छन्। ती बाढीजन्य घटनाबाट १३ जनाको मृत्यु भएको छ भने २२ जना बेपत्ता छन्। असार २४ गते रसुवा भोटेकोशीमा आएको बाढीले सबैभन्दा धेरै मानवीय क्षति पुर्याएको थियो। उक्त घटना माथिल्लो क्षेत्रमा भएको हिमताल विस्फोटका कारण भएको बताइएको छ।
यस्तै, पहिरोका १७५ घटनामा ६ जनाको मृत्यु भएको छ। चट्याङ लागेर २६, आगलागीबाट १४, जंगली जनावरको आक्रमणबाट १२, र लेक लागेर ११ जनाको ज्यान गएको प्रवक्ता सुनारले जानकारी दिए। त्यस्तै, हावाहुरी, सर्पदंश र भारी वर्षाजस्ता अन्य घटनाबाट पनि जनधनको क्षति भएको प्राधिकरणले जनाएको छ।
बाढीबाट मात्रै १,२४६ परिवार र आगलागीबाट १,०४८ परिवार प्रभावित भएका छन्। पहिरो, चट्याङ, भारी वर्षा, सर्पदंश, हावाहुरी, वन डढेलोलगायत घटनाबाट सयौँ परिवार प्रभावित भएका प्राधिकरणले जनाएको छ।
