श्रम संस्कृति पार्टीका अध्यक्ष हर्कराज राईले प्रधानमन्त्रीलाई सदनमा उपस्थित गराएर जवाफदेही बनाउन सभामुखसँग जोडदार माग गर्नुभएको छ । 
प्रतिनिधि सभाको बुधवारको बैठकमा बोल्दै अध्यक्ष राईले नियमावलीको नियम १५ को उपनियम (२) बमोजिम प्रधानमन्त्रीको उपस्थिति सुनिश्चित गर्न सभामुखलाई आग्रह गर्नुभएको हो । सभामुखलाई सम्बोधन गर्दै राईले लामो समयदेखि आफूहरूले प्रधानमन्त्रीको उपस्थितिको माग गर्दै आए पनि सभामुखबाट प्रभावकारी ‘रुलिङ’ हुन नसकेकोमा असन्तुष्टि व्यक्त गर्नुभयो । उहाँले सदनको गरिमा कायम राख्नका लागि प्रधानमन्त्रीलाई सदनमा ल्याउनुपर्ने, अन्यथा नियमावलीको नियम ३१ को उपनियम (१) प्रयोग गरी आफूलाई सदनबाट निष्कासन गर्न चुनौती दिनुभयो । 
उहाँले भन्नुभयो, ‘प्रधानमन्त्रीज्यूलाई सदनमा जवाफदेही बनाएर ल्याउन सक्नुहुन्न भने नियमावलीको ३१ (१) लागू गरेर मलाई यो सदनबाट निष्कासन गरी सदनको गरिमा बढाइदिनुहुन म अनुरोध गर्दछु । कि त प्रधानमन्त्रीज्यूलाई यहाँ बोलाइदिनु पर्यो, होइन भने मलाई निस्केर जा भन्नुप¥यो ।’
राईले सभामुखको कार्यगत बाध्यता र परिस्थितिप्रति आफू जानकार रहेको भएपनि नियमको पालना नहुँदा सदनको मर्यादामा आँच पुगेको टिप्पणी गर्नुभयो । 

प्रजातान्त्रिक गणतन्त्र कङ्गोको पूर्वी क्षेत्रमा अवस्थित सुन खानीको शहर मोंग्बालु हाल इबोला भाइरसको प्रकोपबाट सर्वाधिक प्रभावित क्षेत्र बनेको छ । यस क्षेत्रमा भाइरसको संक्रमणसँगै सर्वसाधारणमा व्याप्त डर, अफवाह र अविश्वासले स्वास्थ्य संकटलाई थप जटिल बनाएको छ । मोंग्बालुको शुनी १ टोलमा इबोलाले जनजीवन प्रभावित तुल्याएको छ । त्यहाँका स्थानीय बासिन्दाहरू स्वास्थ्य प्रणालीको कमजोरी र भीडभाडका कारण मात्र नभई, गलत सूचनाका कारण पनि त्रसित छन् । सुरक्षित अन्त्येष्टि टोली गाउँ पस्दा स्थानीयहरू भयभित र रुष्ट देखिने गरेका छन् । केही बासिन्दाहरू स्वास्थ्यकर्मीले शव कब्जा गरेको आरोप लगाउँछन् भने कतिपयले प्रयोग गरिएका शव व्यवस्थापनका सामग्री र कफिनका कारण नै मानिसहरूको मृत्यु भइरहेको भ्रामक विश्वास पालेका छन् । 
कङ्गोको स्वास्थ्य अधिकारीहरूले सार्वजनिक गरेको पछिल्लो तथ्याङ्कअनुसार मोंग्बालु स्वास्थ्य क्षेत्रमा ३३९ संदिग्ध संक्रमित र ८८ जनाको मृत्यु भइसकेको छ । सशस्त्र हिंसा र विस्थापनको चपेटामा परेको पूर्वी कङ्गोमा स्वास्थ्य सेवाको पहुँच पहिलेदेखि नै सीमित रहेको छ । 
अन्त्येष्टि टोलीका सुपरभाइजर जोन तुमुद्जिबेकाअनुसार समुदायमा फैलिएको भ्रम चिर्न मृतकका परिवारलाई नै प्रक्रियामा सहभागी गराउने रणनीति अपनाइएको छ । इबोला भाइरस शरीरका तरल पदार्थबाट सर्ने भएकाले परम्परागत अन्त्येष्टि पद्धति (शवलाई धुने र छुने कार्य) संक्रमण फैलाउने मुख्य कारक मानिन्छ । सुरक्षित अन्त्येष्टि टोलीले शवलाई कीटाणुरहित बनाउने, सुरक्षित रूपमा ¥यापिङ गर्ने र नियन्त्रित सुरक्षा उपायका साथ अन्त्येष्टि गर्ने गर्दछ । शुरुमा प्रतिरोध गर्ने केही स्थानीयहरू अहिले यो प्रक्रिया स्वीकार गर्न थालेका छन् । 
स्वास्थ्यकर्मीहरूले केवल भाइरससँग मात्र नभई, समुदायमा व्याप्त आक्रोश र हिंसासँग पनि लड्नु परिरहेको छ । मे २१ यता इटुरी प्रान्तमा इबोला उपचार र आइसोलेसन केन्द्रहरूमा कम्तीमा तीनवटा आक्रमणका घटनाहरू दर्ता भएका छन् । 
रुवाम्पारामा परम्परागत अन्त्येष्टिका लागि शव नदिइएको भन्दै प्रदर्शनकारीहरूले उपचार केन्द्रमा आगजनी गरेका थिए । त्यस्तै, मोंग्बालुमा डक्टर्स विदाउट बोर्डर्सको सहयोगमा निर्मित टेन्टहरू जलाइएका छन् । आईतवार साँझ मात्र केही युवाहरूको समूहले मोंग्बालु जनरल अस्पतालमा आक्रमण गरी दुईवटा शव जबर्जस्ती लैजाने प्रयास गरेका थिए, जसका कारण चिकित्सक र बिरामीहरूले भागदौड गर्नुपरेको थियो । 
अत्यन्तै कठिन परिस्थितिमा काम गरिरहेका मोंग्बालुका स्वास्थ्यकर्मीहरूले आधारभूत सुविधा समेत पाएका छैनन् । तुमुद्जिबेकाअनुसार अन्त्येष्टि टोलीका सदस्यहरूले पारिश्रमिक बिना नै केवल मानवीय जिम्मेवारी बोधले काम गरिरहेका छन् । अधिकारीहरूले यो संकट समाधानका लागि स्थानीय समुदायको सहयोग र चेतना अभिवृद्धिमा जोड दिएका छन् । 

राष्ट्रपति रामचन्द्र पौडेलले विश्वको सर्वोच्च शिखर सगरमाथाको प्राकृतिक स्वरूपलाई जीवन्त राख्न र हिमाली वातावरणको संरक्षण गर्न सरोकारवालाहरूसमक्ष आग्रह गर्नुभएको छ । 
मे २९ अर्थात अन्तर्राष्ट्रिय सगरमाथा दिवसको पूर्वसन्ध्यामा विश्वभरका पर्वतारोहीहरूको उपस्थितिमा आयोजित कार्यक्रमलाई सम्बोधन गर्दै राष्ट्रपति पौडेलले यस्तो आग्रह गर्नुभएको हो । सगरमाथा नेपालको भौगोलिक पहिचान मात्र नभएर राष्ट्रको प्रतिष्ठा, गौरव र विश्वकै अमूल्य प्राकृतिक सम्पदा भएको उल्लेख गर्नुभयो । राष्ट्रपति पौडेलले यसको संरक्षण र सन्तुलित उपयोगबाट मात्र पर्यटन क्षेत्रमार्फत मुलुकको अर्थतन्त्रमा दिगो टेवा पुग्ने धारणा व्यक्त गर्नुभयो ।  उहाँले सगरमाथासहित हिमाली क्षेत्रको बहुआयामिक पक्षबारे सार्थक छलफल गर्न र अन्तर्राष्ट्रिय सहकार्य तथा संवाद वृद्धि गर्न यस्ता सम्मेलनको विशेष महत्व रहने उल्लेख गर्नुभयो । राष्ट्रपतिले विश्वव्यापी तापक्रम वृद्धि र जलवायु परिवर्तनका कारण हिमाली क्षेत्रमा उत्पन्न चुनौतीहरूप्रति चिन्ता व्यक्त गर्नुभयो । 
उहाँले भन्नुभयो, ‘जलवायु परिवर्तनका असर र पर्वतारोहण क्षेत्रमा बढ्दो फोहोर जस्ता समस्या अहिले ठुलो चुनौती बनेका छन् । यी समस्याको समाधान गरी सगरमाथा क्षेत्रको जैविक विविधता संरक्षण गर्दै पर्वतारोहणलाई सुरक्षित, दिगो र प्रविधिमैत्री बनाउन थप प्रयास र सहकार्य आवश्यक छ । सगरमाथा केवल नेपालको भौगोलिक पहिचान मात्र नभएर यो सिंगो देशको प्रतिष्ठा, गौरव र विश्वकै अमूल्य प्राकृतिक सम्पदा हो । यी सम्पदाको संरक्षण, संवर्धन, प्रचारप्रसार र सन्तुलित उपयोगबाट नेपालको पर्यटन क्षेत्रमार्फत हाम्रो अर्थतन्त्रमा टेवा पुग्दै आएको विदितै छ । तथापि विश्वव्यापी तापक्रम वृद्धि, जलवायु परिवर्तनका असर र पर्वतारोहण क्षेत्रमा फोहोर थुप्रिने जस्ता समस्या अहिले चुनौती बनेका छन् । यी समस्याको समाधान गरी सगरमाथा क्षेत्रको वातावरण तथा जैविक विविधता संरक्षण गर्दै पर्वतारोहणलाई सुरक्षित एवं दिगो र प्रविधिमैत्री बनाउन थप प्रयास र सहकार्य आजको आवश्यकता हो ।’
राष्ट्रपति पौडेलले दिगो हिमाली पर्यटन र जिम्मेवार पर्वतारोहण आजको प्रमुख आवश्यकता भएको बताउँदै सम्मेलनले पर्वतारोहणका क्रममा प्राप्त ज्ञानलाई सगरमाथाको जीवन्तताका लागि उपयोग गर्ने विश्वास व्यक्त गर्नुभयो । सन् १९५३ मा शाहसी पर्वतारोही तेञ्जिङ नोर्गे शेर्पा र एडमण्ड हिलारीले पहिलो पटक सफल आरोहण गरेसँगै सुरु भएको पर्वतीय पर्यटनको ऐतिहासिक महत्वबारे चर्चा गर्दै राष्ट्रपतिले पर्वतारोहणको माध्यमबाट नेपालको नाम विश्वभर फैलाउन योगदान दिने कीर्तिमानी आरोही तथा शेर्पा समुदायप्रति सम्मान प्रकट गर्नुभयो ।

 २०८३ जेठ १२ गते

 १३:५०

अमेरिकी राष्ट्रपति डोनाल्ड ट्रम्पले इरानसँगको सम्झौता प्रक्रियामा हतार नगर्न आफ्ना वार्ताकारहरूलाई निर्देशन दिनुभएको छ । समय आफ्नै पक्षमा रहेको उल्लेख गर्दै उहाँले वार्तालाई निष्कर्षमा पु¥याउन हतारिनु आवश्यक नरहेको बताउनुभएको हो । आफ्नो सामाजिक सञ्जाल ट्रुथ सोसलमार्फत धारणा सार्वजनिक गर्दै राष्ट्रपति ट्रम्पले सम्झौता सम्पन्न नभएसम्म, यसको प्रमाणीकरण नभएसम्म र अन्तिम हस्ताक्षर नहुन्जेल नाकाबन्दी पूर्ण रूपमा प्रभावकारी रहने बताउनु भयो । उहाँले सम्झौताका लागि दुवै पक्षले पर्याप्त समय लिएर सही निष्कर्षमा पुग्नुपर्नेमा जोड दिनुभयो । राष्ट्रपति ट्रम्पले इरानलाई कुनैपनि हालतमा परमाणु हतियार विकास गर्न वा प्राप्त गर्न नदिने आफ्नो अडान पुनः दोहो¥याउनु भयो । उहाँले हाल भइरहेको वार्ता प्रक्रिया व्यवस्थित र रचनात्मक ढंगले अघि बढिरहेको समेत जानकारी दिनुभयो । यसैबीच, इजरायली सरकारी स्रोतलाई उद्धृत गर्दै सञ्चारमाध्यमहरूले जनाएअनुसार ट्रम्पले इजरायली प्रधानमन्त्री बेन्जामिन नेतान्याहुलाई इरानको परमाणु कार्यक्रम पूर्ण रूपमा बन्द नभएसम्म र आफ्नो क्षेत्रबाट सम्पूर्ण संवद्र्धित युरेनियम नहटाएसम्म कुनैपनि अन्तिम सम्झौतामा हस्ताक्षर नगर्ने आश्वासन दिनुभएको छ । अर्कोतर्फ, इरानी विदेश मन्त्रालयका प्रवक्ता इस्माइल बाघेईले शनिवार इरान र अमेरिका युद्ध अन्त्यका लागि समझदारी पत्रलाई अन्तिम रूप दिन प्रयासरत रहेको बताउनुभएको थियो ।