२७ जेठ, २०८२| एएफसी एसियन कप छनोटअन्तर्गत नेपालले आज लाओससँग प्रतिस्पर्धा गर्दैछ। नेपाल र लाओसबीचको रोमाञ्चक खेल बुधबार साँझ नेपाली समयअनुसार ५:४५ बजे न्यु लाहो स्टेडियममा सुरु हुनेछ।
नेपाली राष्ट्रिय फुटबल टोलीका मुख्य प्रशिक्षक म्याट रोसले घरेलु टोली लाओसविरुद्धको खेललाई सामान्य रूपमा नलिएको बताएका छन्। मंगलबार साँझ आयोजित प्रि-म्याच कन्फ्रेन्समा उनले लाओसले घरेलु मैदानको फाइदा उठाउन सक्ने भएकाले आफ्नो टोली पूर्ण सतर्क रहेको उल्लेख गरे।
“लाओस एक संगठित र आक्रमक टोली हो। यदि हामीले सानो गल्ती गर्यौं भने उनीहरू खतरनाक बन्न सक्छन्,” प्रशिक्षक रोसले भने, “त्यसैले हामीले यो खेललाई अत्यन्त गम्भीरतापूर्वक लिएका छौं। दुवै टोली अंक जोड्न आतुर छन्।”
समूह ‘एफ’ मा रहेका नेपाल र लाओस दुवैले छनोटको पहिलो खेलमा हार बेहोरेका छन्। त्यसैले दुवै टोली आजको खेलमा अंक जोड्ने लक्ष्यमा छन्। नेपालले अहिलेसम्म लाओससँग हार नबेहोरेको इतिहासलाई कायम राख्दै जित निकाल्ने योजनामा छ।नेपालले लाओससँगको खेलअघि हङकङसँग मैत्रीपूर्ण खेल खेलेको थियो, जहाँ खेल गोलरहित बराबरीमा टुंगिएको थियो। प्रशिक्षक रोसले हङकङविरुद्ध खेलेको टोलीमा केही परिवर्तन हुन सक्ने संकेत गरेका छन्। “हङकङविरुद्ध मैदानमा उत्रिएको टोलीमा केही फेरबदल हुन सक्छ। सम्भवतः हामी बलियो टोली उतार्नेछौं,” उनले भने। तर, हङकङविरुद्ध पहिलो रोजाइमा खेलेका डिफेन्डर सनिश श्रेष्ठ भने चोटका कारण यो खेलमा उपलब्ध हुनेमा संशय छ।नेपाली टोलीका कप्तान किरण चेम्जोङले लाओसविरुद्धको खेलका लागि टोली पूर्ण तयार रहेको बताए। “लाओससँग प्रतिस्पर्धा गर्न हामी सधैं उत्साहित र तयार रहन्छौं,” प्रि-म्याच कन्फ्रेन्समा उनले भने, “पछिल्ला चार खेलमा मैले पनि सहभागिता जनाएको छु। हामी शारीरिक र मानसिक रूपमा तयार छौं।” नेपालका फरवार्ड अन्जन विष्टका लागि आजको खेल ऐतिहासिक बन्न सक्छ। उनले हाल हरि खड्का र निराजन रायमाझीसँगै नेपालका लागि सर्वाधिक १३ गोलको कीर्तिमान बराबरी गरेका छन्। यदि आज लाओसविरुद्ध गोल गरे भने उनी नेपालका सर्वाधिक गोलकर्ता बन्नेछन्।नेपाल र लाओसबीच हालसम्म ६ खेल भएका छन्, जसमा नेपालले ४ खेल जितेको छ भने २ खेल बराबरीमा सकिएको छ। यसले नेपाललाई मनोबल प्रदान गरेको छ।साउदी अरबमा सन् २०२७ मा हुने एएफसी एसियन कपका लागि अहिले भइरहेको छनोट तेस्रो तथा अन्तिम चरण हो। नेपालले पहिलो खेलमा मलेसियासँग २-० ले हार बेहोरेको थियो भने लाओस भियतनामसँग ५-० ले पराजित भएको थियो। आजको खेल नेपालको दोस्रो अवे खेल हुनेछ।लाओसविरुद्धको खेलमा नेपाल सतर्क, आत्मविश्वासी र रणनीतिक रूपमा तयार देखिन्छ। प्रशिक्षक रोस र कप्तान चेम्जोङको नेतृत्वमा टोली अंक जोड्न र छनोटमा आफ्नो सम्भावना जीवित राख्न कटिबद्ध छ। साथै, अन्जन विष्टको सम्भावित कीर्तिमानले खेललाई थप रोमाञ्चक बनाएको छ। नेपाली टोलीलाई शुभकामना!
